Сүт тістердің күтімі, сүт тістері деген не?

Бала өміріндегі маңызды кезеңдердің бірі – сүт тістердің шығуы. Бұл үрдіс бала 6 айға толған кезде басталып, шамамен 2,5-3 жасқа дейін жалғасады. Сүт тістердің пайда болуы баланың жалпы дамуы мен денсаулығына тікелей байланысты. Сондықтан сүт тістердің күтімі ерте жастан дұрыс жүргізілуі керек.
   Сүт тістері – баланың бірінші тістері. Олар шамамен 20 тіс болып, төменгі және жоғарғы жақта бірдей мөлшерде өседі. Әдетте, алғашқы тіс алты айда шыға бастайды. Бұл көбінесе алдыңғы төменгі екі тістің шығуынан басталады. Егер алғашқы тіс шығу мерзімі 1 жасқа дейін кешіксе, тіс дәрігеріне бару қажет. 

Сүт тістер тек шайнау қызметін атқарып қана қоймай, тұрақты тістердің дұрыс шығуына бағыт береді. Сүт тістердің дұрыс орналасуы болашақта тұрақты тістердің де түзу әрі сау болуына көмектеседі. Егер сүт тістері уақытынан бұрын түсіп қалса, бұл тұрақты тістердің қисық шығуына себеп болуы мүмкін.

 Бір жасқа дейінгі балаларда сүт тістердің күтімі жұмсақ дәкемен немесе арнайы силиконды тіс щеткасымен жүзеге асырылады. Тісті күтіп ұстау үшін күніне екі рет жұмсақ тіс щеткасын пайдалану қажет. Баланың тісін щеткамен тазалауды бірінші тіс шыққан күннен бастап әдетке айналдырған дұрыс.
   Бала 2 жасқа толған соң тістерін өз бетінше тазалауды үйретуге болады. Дегенмен ата-ана бақылауы маңызды. Тіс пастасы ретінде құрамында фтор бар, балаға арнайы шығарылған пасталарды қолдану керек. Тіс щеткасы жұмсақ болуы шарт, өйткені сүт тістер мен қызыл иектер өте нәзік болады.

   Сүт тістерді күтудің тағы бір маңызды бөлігі – тамақтану тәртібі. Қышқыл, тәтті тағамдар мен сусындар тістерге зиян тигізуі мүмкін. Әсіресе түнде тәтті тағамнан кейін ауыз қуысын жуып, су ішу әдетін қалыптастырған дұрыс.